வரலாற்றுபயணங்கள் 2: ஐஹோளே

ஏறக்குறைய 1377 ஆண்டுகளுக்குப் பின்னர் மீண்டும் வாதாபியில்......😜😜
இந்த முறை பகைமை உணர்வோடல்ல..... கலை உணர்வோடு......🙂🙂

சாளுக்கிய பேரரசனான மாமன்னர் இரண்டாம் புலிகேசியின் தலைநகரான வாதாபியில் உள்ள குகைகளை காணும் ஆசையில் வாதாபி சென்றோம்.

வாதாபி செல்லும் வழி நெடுகிலும் , லேசான தூறல்களும், பளிச்சிடும் மின்னல்களும் எங்களை வரவேற்று அழைத்துச் சென்றது.
செல்லும் வழியெல்லாம் புலிகேசி மாமன்னரும், மாமன்னர் நரசிம்ம போத்தரசர் நம் கவனத்தை ஈர்த்தனர் கல்கி வாயிலாக.....

இரவு முதல் ஜாமத்தில் தொடங்கிய எங்களது பயணம் மூன்றாம் ஜாமம் ஆரம்பிக்கும் சமயத்தில் வாதாபி அடைந்தோம். தங்குமிடத்தில் வரவேற்பறையில் சில படங்களை கண்டோம். அங்கு இருந்த மகிஷாசுரமர்த்தினியின் படத்தை கண்டதும் வாதாபி குடைவரைகளை மறந்து , முதலில் அந்த சிற்பத்தை காண வேண்டும் என்ற ஆவல் மேலோங்கியது . அதன் விளைவாக காலையில் வாதாபியிலிருந்து சற்றே வடகிழக்கில் ஏறக்குறைய மூன்று காததூரமுள்ள ஐஹோளே என்னும் ஊருக்கு செல்லுகையில் வழிநெடுகிலும் பசுமை எங்கு நோக்கினும் பச்சை நிறம். வலது புறத்தில் சற்று தூரத்தில் மேகங்களை தாங்கி நிற்கும் சிறிய குன்றுகள், ஒரு சிலிர்ப்பை ஏற்படுத்தும் லேசான சாரல் மழை.

மனதிற்குள் மிகுந்த பரவசத்துடன் துர்கை கோயில் எது என்று விசாரித்து கோவிலை அடைந்ததும், நம்மில் அடைத்து வைத்திருந்த பல பரவசம் எண்ணங்கள் எல்லாம் வெடித்து சிதறியது. அதற்கு காரணம் இல்லாமல் இல்லை நான் இதுவரை கேள்விப் பட்டிராத ஓர் பிரம்மாண்டமான வரலாற்றுப் பக்கங்களைப் தன்னுள்ளே கொண்டிருந்த ஊர் இந்த ஐஹோளே..
பார்க்கும் இடமெல்லாம் பழமையை பறைசாற்றும் கோயில்கள், கோயிலினுள்ளே புல்வெளிகள் போர்திய தரைகள், மணம் வீசும் பூக்களைக் கொண்ட குறுஞ்செடிகள். ஏறக்குறைய 120 க்கும் மேலான இந்து , சமண , புத்த கோயில்கள். ஐந்தாம் நூற்றாண்டில் தொடங்கி பதிமூன்றாம் நூற்றாண்டு வரை பல கட்டுமானப் பணிகளையும் புனரமைப்புக்களையும் பெற்றுள்ளன இக்கோயில்கள் என்றால் பார்த்துக் கொள்ளுங்கள் அதனுடைய வரலாற்றுப் பயணத்தை!!!!

சாளுக்கிய பேரரசின் தலைநகராக விளங்கிய இந்த ஊர் முதலாம் புலிகேசி (544 -567) காலத்தில் வாதாபிக்கு மாற்றப்பட்டுள்ளது . இருந்தபோதிலும் சாளுக்கியப் பேரரசின் முக்கியமான நகரமாகவே அதன்பின் பல நூற்றாண்டுகளாக விளங்கிவந்துள்ளது.

இங்குள்ள கல்வெட்டு ஒன்றில் இரண்டாம் புலிகேசியின் (610 - 642) தென்னாட்டுப் படையெடுப்பு அதற்கு முந்தைய மன்னனான மங்களேசனை(598 -610) முறியடித்தது போன்ற தகவல்கள் காணப்படுகின்றது.... முதலாம் புலிகேசியின் மகன் முதலாம் கீர்த்திவர்மன் (567 -598) மங்களேசனின் அண்ணன் என்பதும் , இரண்டாம் புலிகேசியின் தந்தை என்பதும் குறிப்பிடத்தக்கது.

"நகரேஷு காஞ்சி"என்று குறிப்பிட்ட மகாகவி பாரவி பற்றிய தகவல்களும் இங்குள்ள கல்வெட்டுகளில் காணப்படுகிறது.
642 ஆம் ஆண்டில் நடைபெற்ற வாதாபிப் போரில் நரசிம்ம பல்லவரால்(630 -668) முறியடிக்கப்பட்டு சாளுக்கியப் பேரரசு அழிக்கப்பட்டு இரண்டாம் புலிகேசி மன்னரும் கொல்லப்பட்டுள்ளார்....

முதலாம் அமோகவர்ஷ நிருபதூங்கண்
(814 - 878) என்ற ராஷ்ட்ரகூட பேரரசரின் ஆட்சி முறையைப் பற்றிய கல்வெட்டுக் குறிப்புகளும் இந்த ஊரில் காணப்படுகின்றது. இந்த ஊரின் வரலாறு மிகப்பெரிய வராலாற்றுப் புதினங்கள் எழுதுவதற்கு போதுமான தகவல்களை கொண்டுள்ளதால் , நாம் இதை இப்படியே விட்டு விட்டு துர்கை கோவிலுக்குள் செல்லலாம்.

இந்திய தொல்பொருள் துறையின் பெரிய பாதுகாப்பு வளையத்தின் வடமேற்கு மூலையின் வழியாக உள்ளே நுழைந்தால் ஓர் அழகிய அம்பாரி வைத்து யானையின் பின்புறத்தை போல் தோற்றமளிக்கும், பார்க்கும் பொழுதே பழமையைப் பிரதிபலிக்கும் கோயிலைக் காணலாம்...

ஆம் , இது ஒரு துல்லியமாக வடிவமைக்கப்பட்ட கஜபிருஷ்ட அமைப்பு. இந்தக் கோயிலில் ஒரு இடத்தையும் விடாமல் அனைத்து இடத்திலும் புடைப்புச் சிற்பங்கள்.
கிழக்கு மேற்காக அமைந்துள்ள இந்தக் கோயில் ஐந்தடி உயரத்தில் அமைக்கப்பட்டு சுற்றிலும் இரண்டரை அடி உயர மதில் சுவர் போன்ற அமைப்பும் , அதற்குமேல் ஏறக்குறைய ஆறு அடி உயரத்தில் தூண்களும் தூண்களுக்கு மேல் தளமும் அமைக்கப்பட்டுள்ளது. இங்குள்ள தூண்களின் சிறப்பம்சம் என்னவென்றால் காதல். அன்பின் வெளிப்பாட்டை அனைத்து தூண்களிலும் காணலாம். இவர்கள் மேற்கூரையிலும் சிற்பங்களை செதுக்க மறக்கவில்லை , அதுவும் மிகத் துல்லியமாக தெளிவாக வடிவமைத்துள்ளனர்.
கருவறையின் உள்ளே எந்தவித தெய்வமும் காணப்படவில்லை அர்த்தமண்டபம் பெரியதாகவும் பல குறுஞ்சிற்பங்கள் கொண்ட தூண்களையும், வித்தியாசமான வடிவங்கள் கொண்ட சாளரங்களையும் கொண்டுள்ளது.

இந்தக் கோயிலின் கோஷ்டத்தில் , ரிஷபத்தில் பத்து கைகளுடன் சாய்ந்து நிற்கும் சிவன் , நரசிம்ம மூர்த்தி, நான்கு கைகளுடன் கருடன் மீது விஷ்ணு மூர்த்தி,பூதேவியை தோளில் சுமக்கும் வராக மூர்த்தி, மகிஷாசுரமர்த்தினி ( பார்த்த மாத்திரத்தில் வாதாபி குடைவரையை மறந்து இங்கே வரவைத்த அற்புத சிற்பம் ) மற்றும் எட்டு கைகளுடன் விஷ்ணு மூர்த்தி போன்ற களகமூர்த்தி காணப்படுகின்றனர் .

இது மட்டுமல்ல அனைத்து தூண்களிலும் சிற்பங்கள் காணப்படுகின்றன.....

மேலும் இந்தக் கோவிலில் துர்க்காதேவி பிரதிஷ்டை செய்யப்படவில்லை , கோட்டைக்கு அருகில் உள்ள கோவில் 'துர்கடகுடி' என்பது துர்கா கோயில் ஆயிற்று.

இது வெறும் ஆரம்பம் தான் சாளுக்கிய கட்டடக்கலையின் உச்சத்தை தொட்டது அருகிலுள்ள பட்டடக்கல் எனும் ஊர்....

அதைப் பற்றி விரிவாக அடுத்தடுத்த பதிவில் அறியலாம்......

#வாதாபி
#சாளுக்கியப்_பேரரசு
#ஐஹோளே , #அகோலி
#Aihole ,#துர்காதேவிகோயில் #மகிஷாசுரமர்தினி
#வரலாற்றுப்_பயணங்கள்
#chalukya_architecture

ஐஹோளே கோயில்(கோட்டை அருகில் அமைந்த கோவில்)

கஜபிருஷ்ட அமைப்பில் காணப்படும் கோயில்,ஐஹோளே, கர்நாடகம்

புல்வெளி தழுவிய தரைகளோடு திருக்கோயில்,ஐஹோளே,

கோயிலின் முகப்புத் தோற்றம்

யாழிகளின் வாயிலிருந்து அழகிய முத்துமணிகள் உமிழ்வது போன்ற அமைப்புடைய தோரணங்களுடன்
(முக்தாக்ராஸம் )
கூடிய தூண்

தகவல் : சங்கரநாராயணன் G

ஐஹோளே துர்கா கோயில் கோஷ்டத்தில் அமைந்துள்ள நரசிம்ம மூர்த்தி

ஐஹோளே துர்கா கோயில் கோஷ்டத்தில் அமைந்துள்ள சங்கு சக்ரதாரியாக விஷ்ணு கருடன் மீது.......

ஐஹோளே துர்கா கோயில் கோஷ்டத்தில் அமைந்துள்ள மகிஷாசுரமர்த்தினி. அழகிய முகத்துடன் மகிசாசுரமர்த்தினி இந்த சிற்பத்தை பார்த்தவுடன் தான் இங்கு வர வேண்டும் என்ற எண்ணம் தூண்டியது, கைகளில் சங்கு சக்கரத்துடன் பல்வேறு ஆயுதங்கள் , தத்ரூபமான சிம்மவாகனம், அதுவும் எருமை மாட்டு கோபமாக பார்க்கின்ற தோரணையில் , மகிஷாசுரன் மீது காலை வைத்து இருக்கும் காட்சி சிம்மவாகினி.....

சன்ன வீரத்தோடு ஒய்யாரமாக மகிஷனை வதம் செய்யும் சிம்ம வாகினி..... தலைக்கவசத்தின் அழகான அலங்காரமும், கழுத்தில் அணிகலன்களுடன் அழகிய மகிஷாசுரமர்த்தினி...

களகநாதர், ஆஷ்ட புஜம், சிவரூபம்.
பிரம்மா , விஷ்ணு மற்றும் 
சிவன் முப்பெரும் தேவரின் ஆயுதங்கள் ஏந்தி முதுகெலும்பை மாலையாய் தரித்தவர்

கார்மேகங்கள் சூழ்ந்திருக்க பச்சை புல்வெளிகள் தழுவி நிற்க வித்தியாசமான கோணத்தில் .......

நிறைய வெவ்வேறு தோரணங்களை கண்டிருப்போம், கல்லினால் கலைநயம் மிக்க தோரணம் அமைத்த சிற்பிகள் மாமேதைகள் தானே...

மேல் ஆமலகம்:(நெல்லிக்கனி வடிவில் அமையப்பெற்ற தூணினின் மேல் பக்கம் )
Courtesy : Sankara Narayananan G 

சாளுக்கியப் பேரரசின் சின்னம்

கருவறை காலியாக உள்ளது

கோயில் அருகேயுள்ள அழகிய கேணி.

வித விதமான சாளரங்கள் :

அர்த்தநாரீஸ்வரர் , உள்ளங்காலில் இருந்து உச்சிவரை ஆணுக்கும் பெண்ணுக்கும் உள்ள வித்தியாசங்களை நுணுக்கமாக வடிவமைத்துள்ளனர். காலில் உள்ள தண்டை, இடுப்பில் உள்ள ஒட்டியாணம் , கையிலுள்ள வளையங்கள் , காதில் உள்ள குண்டலங்கள், கண்ணின் புருவ அமைப்பு, இடுப்பின் நளினம் , இன்னும் இன்னும்....

தலை இருந்திருந்தால் இன்னும் சிறப்பாக இருந்திருக்கும் இந்த காதலர்களின் கொஞ்சல் மொழி

ஆரத்தழுவும் ஆரணங்கு, முதுகை வளைத்து பிடிப்பதிலேயே அவள் மீது கொண்டுள்ள பாசத்தை புரிய வைக்கின்றது...

அர்த்த மண்டபத்தின் வாயிலில் காணப்படும் அழகிய சிற்பங்கள்

தர்ப்பண பதகம்